Ndryshimi kulturor që po sjell zbatimi i ligjit për kontrollin e duhanit në shoqërinë tonë
26.12.2013Komunikatë nga takimi
Pejë, 19 Dhjetor- Takimi i organizuar nga KADC në bashkëpunim me OJQ Syri i Vizionit, zyrën e OBSH- Prishtinë dhe Ministrinë e Shëndetësisë kishte për qëllim ngritjen e vetëdijes së qytetarëve për respektimin e Ligjit për kontrollin e duhanit dhe nxitjen e organeve përgjegjëse në kryerjen e detyrave ligjore për mbikëqyrjen efektive të zbatimit të këtij ligji. Në takim morën pjesë edhe inspektorati sanitar komunal- Pejë, inspektorati sanitar qendror, inspektorati i arsimit- Pejë, IKSHP-dega në Pejë, përfaqësues të shoqërisë civile dhe media nga komuna e Pejës.
Nga diskutimet në këtë takim u konstatua se zbatimi i ligjit për kontrollin e duhanit në komunën e Pejës është relativisht i mirë. Ka shkelje të ligjit (tymosje të duhanit) në lokalet gastronomike; nuk përjashtohen rastet e tymosjes së duhanit në institucionet publike. Përfaqësues të qytetarëve dhe shoqërisë civile deklaruan se ka shkelje të ligjit (tymosje të duhanit) në hapësirat e mbyllura.
Përfaqësues të inspektoratit sanitar në komunën e Pejës thanë se janë të angazhuar për zbatimin e ligjit për kontrollin e duhanit duke përmendur këtu edhe vështirësitë me të cilat ballafaqohen siç është mungesa e stafit dhe pagat e vogla apo mungesa e stimulimit për punën jashtë orarit të rregullt. Sipas këtij inspektorati që nga hyrja e në fuqi e ligjit për kontrollin e duhanit janë inspektuar shumica e objekteve gastronomike. Me fillimin e sezonit dimëror është shtuar edhe numri i shkeljeve të ligjit (ndalimit të tymosjes në vende publike). Nuk kanë ngritur asnjë procedurë për kundërvajtje deri më tani.
Rekomandimet e nxjerra nga takimi
Të formohet grupi koordinues për mbikëqyrjen e zbatimit të ligjit për kontrollin e duhanit në rajonin e Pejës i përbërë nga: inspektorati sanitar- Pejë (Xhelal Bytyqi), drejtorati i arsimit- Pejë (Musa Krasniqi), inspektorati i tregut- Pejë (Ismet Shabanaj), OJQ Syri i Vizionit (Enver Ulaj), OJQ CTI (Redzo Kojic), TV Dukagjini (Lirije Haziraj), Radio Peja (Besarta Muriqi), Policia e Kosovës- Rajoni Pejë dhe IKSHP OJQ Merita (Afërdita Këqiku- kryesuese e grupit koordinues), IKSHP- dega në Pejë (Arbnora Nurboja- koordinatore e grupit).
Të mbahen takime të rregullta- së paku një herë në muaj të grupit koordinues për mbikëqyrjen e zbatimit të ligjit për kontrollin e duhanit në rajonin e Pejës.
Të gjitha palët e përfshira në grup të raportojnë së paku një herë në muaj pranë grupit koordinues për punën e tyre dhe hapat që do të ndërmarrin për përmirësimin e zbatimit të ligjit për kontrollin e duhanit.
Të identifikohen të ashtuquajturat pika të nxehta- vendet ku ka shkelje më të shpeshta të ligjit dhe të njëjtat të jenë subjekt i vizitave sistematike dhe i ndëshkimeve të parapara me ligj në rast se gjenden shkelje.
Të organizohen vizita inspektuese të përbashkëta të inspektoratit komunal sanitar dhe policisë së Kosovës- rajoni i Pejës me prioritet në mjediset ku shkeljet e ligjit janë më të shpeshta.
Të organizohen vizita inspektuese sipas mekanizmit rotativ ndërmjet inspektorateve sanitare të komunave të ndryshme duke përfshirë edhe inspektoratin sanitar qendror.
Të rritet bashkëpunimi mes inspektoratit sanitar dhe lokaleve gastronomike me qëllim të informimit të tyre rreth kushteve të hapësirave shtesë (të hapura) ku mund të lejohet pirja e duhanit dhe eliminimi i atyre të ndërtuara në kundërshtim me ligjin.
Të përpilohet një qarkore informative për rregullat e ndalimit të pirjes së duhanit në institucionet arsimore dhe tu dërgohet drejtorëve të të gjitha shkollave në rajonin e Pejes.
Të ndërmerren aktivitete vetëdijësuese në mediet lokale dhe kombëtare me qëllim të ngritjes së vetëdijes për respektimin e ligjit për k. e duhanit. Gjithashtu, nëpër shkolla të ndërmerren aktivitete edukative-vetëdijësuese për rreziqet shëndetësore të konsumimit dhe ekspozimit ndaj tymit të duhanit.
Të publikohet numri i dënimeve të shqiptuara ndaj subjekteve shkelëse të ligjit.